Birlik sammitinin açılışındakı çıxışında Böyük Britaniyanın kralı III Çarlz, gözlənildiyi kimi, Britaniyanın transatlantik kölə ticarətində iştirakına görə üzr istəməyib, lakin hadisəni tarixin "utancverici” bir fəsli adlandırıb.
Musavat.com xarici mediaya istinadla xəbər verir ki, Karib adası Antigua və Barbudada Birlik hökumət başçılarının görüşündən əvvəl Britaniyada bəziləri kraldan kölə ticarətinə görə rəsmi üzr istəməsini tələb ediblər, lakin Bukinqem sarayı əvvəlcədən rəsmi üzr istənilməyəcəyini bildirib.
Zirvədə iştirak edən Britaniya baş naziri Endi Börnhem əvvəllər rəsmi üzr istəməyi istisna etməyəcəyini, lakin kompensasiya tələblərinin haqlı olduğuna inanmadığını bildirmişdi.
Kral Çarlz çıxışında keçmiş əsrlərdə transatlantik kölə ticarətinin qurbanlarının taleyindən nə qədər dərin kədərləndiyini vurğulamağa çalışıb.
“Transatlantik kölə ticarəti hələ də bu adaları və Birliyin digər üzvlərini narahat edir. Daha əvvəl də dediyim kimi, tarixin bu utancverici fəsli ürəyimi dəhşətlə, ruhumu isə böyük kədərlə doldurur”, - deyə kral bildirib.
“Biz tarixi seçə və ya dəyişdirə bilmərik”, - deyə o, sözünə davam edib. “Bu, əcdadlarımızdan miras qalmış, bütün mürəkkəblikləri ilə bilməyəcəyimiz bir mirasdır. Bu mirasa onların uğurları və səhvləri, yaxşı əməlləri və ədalətsizlikləri daxildir”.
Kral cütlüyü Karib dənizinə tur çərçivəsində Birlik sammitini ziyarət edir. III Çarlz səfərin hər mərhələsində kölə ticarəti mövzusuna toxunur.
Turun ilk dayanacağı olan Baham adalarında kral Çarlz Qayanada kölə üsyanlarının vəhşicəsinə yatırılması qurbanlarının xatirəsinə ucaldılmış abidəni ziyarət etməzdən əvvəl bir çıxışında kölələrin əzablarından danışıb.
Millətlər Birliyi, əsasən Afrika, Asiya və Karib dənizində yerləşən 56 müstəqil ölkədən ibarət bir qrupdur. Onların hamısı olmasa da, əksəriyyəti keçmiş Britaniya müstəmləkələridir. Britaniya monarxı hələ də Birləşmiş Krallıq xaricindəki 14 Birlik ölkəsində dövlət başçısıdır.
Birliyə daxil olan ölkələrin hökumət başçılarının görüşü hər iki ildən bir, hər dəfə yeni bir ölkədə keçirilir.
Mənbə: musavat.com
scorpion.az