İspaniya futbolunun əfsanələrindən Raul Qonsales məşqçilik karyerasında yeni mərhələyə qədəm qoyub. O, “Real Oviedo”nun əsas komandasının baş məşqçisi vəzifəsinə təyin edilib. Bu, 49 yaşlı mütəxəssisin peşəkar səviyyədə ilk baş məşqçilik təcrübəsi olacaq.
Bu barədə İspaniya klubu rəsmi açıqlama yayıb.
Asturiya təmsilçisi daha əvvəl vəzifəsindən ayrılan Xulian Kalero ilə yollarını ayırdıqdan sonra onun əvəzinə Raul Qonsalesi gətirib. Klubun açıqlamasına əsasən, tərəflər 30 iyun 2028-ci ilədək qüvvədə olacaq müqavilə imzalayıblar.
Beləliklə, Raul həm cari mövsümün qalan hissəsində, həm də növbəti mövsümdə komandanı çalışdıracaq. Bu təyinat klubun sahibi olan “Pachuca” qrupunun ispaniyalı mütəxəssisə etimadını göstərir.
Məşqçilik təcrübəsi “Real Madrid” akademiyasında formalaşıb
Raul Qonsales məşqçilik fəaliyyətinə 2018-ci ildə “Real Madrid” akademiyasında başlayıb. O, müxtəlif yaş qruplarında çalışdıqdan sonra altı mövsüm ərzində “Real Madrid Castilla”nın baş məşqçisi olub.
Onun rəhbərliyi altında Madrid klubunun gənclər komandası 2020-ci ildə UEFA Gənclər Liqasının qalibi olub. Bu müddətdə Raul akademiyanın perspektivli futbolçuları ilə işləyərək məşqçilik təcrübəsi qazanıb.
Futbolçu kimi isə o, 15 ildən artıq “Real Madrid”in formasını geyinib və klub tarixinin ən tanınmış simalarından birinə çevrilib.
İlk sınaq “Girona”ya qarşı olacaq
Raul Qonsalesin yeni komandasında debütü noyabrın 15-də nəzərdə tutulub. “Real Oviedo” həmin gün İspaniya çempionatı çərçivəsində “Carlos Tartiere” stadionunda “Girona”nı qəbul edəcək.
Mənbə: publika.az
scorpion.az