Evdə istifadə olunmayan paltar, qab-qacaq, köhnə elektronika və müxtəlif əşyaların illərlə saxlanılması bir çox insan üçün adi haldır. Bəs ehtiyacımız olmayan əşyalardan niyə qurtula bilmirik?
Mütəxəssislərin fikrincə, bunun əsas səbəblərindən biri əşyalara emosional bağlanmaqdır. İnsanlar müəyyən əşyanı sadəcə maddi predmet kimi deyil, keçmişdə yaşadığı hadisələrlə əlaqələndirə bilirlər. Bu səbəbdən həmin əşyanı atmaq onlarda xatirədən imtina etmək hissi yaradır.
Digər səbəb isə "gələcəkdə lazım ola bilər” düşüncəsidir. İstifadə olunmayan əşyalar haqqında qərar verərkən insanlar gələcəkdə onlara ehtiyac yarana biləcəyini düşünür və əşyanı saxlamağa üstünlük verirlər.
Maddi dəyər də burada mühüm rol oynayır. İnsan pul ödəyərək aldığı əşyanı istifadə etməsə belə, onu atmağı "pulu boşuna xərcləmək” kimi qəbul edə bilər. Nəticədə həmin əşya uzun müddət evdə qalır.
Bəzi hallarda isə problem qərar verməkdə çətinliklə bağlı olur. İnsan "saxlayım, yoxsa atım?” sualına cavab verməkdə tərəddüd edir və ən asan variant kimi əşyanı olduğu yerdə saxlamağı seçir.
Psixoloqlar hesab edirlər ki, istifadə olunmayan əşyaları ayırarkən onların sonuncu dəfə nə vaxt istifadə edildiyini və yaxın gələcəkdə həqiqətən lazım olub-olmayacağını düşünmək faydalıdır.
Beləliklə, evdə illərlə saxladığımız hər əşyanın maddi dəyəri olmasa da, onun bizim üçün emosional və ya psixoloji mənası ola bilər. Bəzən isə sadəcə ondan ayrılmaq qərarını vermək çətin olur.
Şahanə Ziyad
Mənbə: azxeber.com
scorpion.az