Uğur qazanan insanların gündəlik vərdişləri ilə bağlı müxtəlif araşdırmalar aparılır. Bu yanaşmalardan biri də həftə ərzində müəyyən vaxtın yeni bilik və bacarıqların əldə edilməsinə sərf olunmasını nəzərdə tutan “5 saat qaydası”dır.
Bu metodun adı İlon Mask, Uorren Baffet, Bill Qeyts və Opra Uinfri kimi tanınmış şəxslərlə də əlaqələndirilir. Yanaşmanın əsas ideyası olduqca sadədir: insan həftənin beş günü ərzində hər gün təxminən bir saatını məqsədli şəkildə öyrənməyə ayırır.
Bu zaman söhbət yalnız kitab oxumaqdan getmir. Ayrılan vaxt yeni bir sahəni araşdırmağa, peşəkar bacarıqları təkmilləşdirməyə, müxtəlif mənbələrdən məlumat toplamağa və əldə olunan bilikləri təhlil etməyə sərf edilə bilər.
“5 saat qaydası”nın əsas üstünlüyü öyrənməni birdəfəlik fəaliyyət deyil, davamlı vərdişə çevirməsidir. Gündə bir saat çox böyük vaxt kimi görünməsə də, həftəlik hesabla bu, beş saatlıq məqsədli öyrənmə deməkdir. Bu rejim uzun müddət qorunduqda insan il ərzində yüzlərlə saatını yeni biliklərə sərf etmiş olur. Nəticədə həm müəyyən sahələr üzrə məlumat bazasının genişlənməsi, həm də peşəkar bacarıqların inkişafı mümkün ola bilər.
Metodun tərəfdarlarının yanaşmasına görə, əsas məsələ gün ərzində uzun saatlar öyrənmək deyil. Vacib olan, iş və digər gündəlik fəaliyyətlər arasında inkişaf üçün sabit vaxt müəyyənləşdirməkdir.
Bu bir saat kitab mütaliəsi, araşdırma, onlayn təlim, yeni dil öyrənilməsi və ya konkret peşə üzrə biliklərin artırılmasına həsr oluna bilər.
Beləliklə, “5 saat qaydası” konkret bir uğur formulu deyil, davamlı öyrənmə vərdişinin yaradılmasına əsaslanan yanaşmadır. Onun nəticəsi isə seçilən istiqamətdən, öyrənmə metodundan və bu rejimin nə qədər davam etdirilməsindən asılıdır.
Qeyd edək ki, sözügedən yanaşma “Blinkist” tərəfindən yayımlanan materialda təqdim olunur və materialın reklam xarakterli olması nəzərə alınmalıdır. Buna görə də orada konkret şəxslərin vərdişləri və metodun effektivliyi ilə bağlı irəli sürülən fikirlər müstəqil elmi nəticə kimi qəbul edilməməlidir.
Cəlalə
Mənbə: yenisabah.az
scorpion.az