ABŞ müharibənin başa çatdırılmasına dair danışıqlarda İran tərəfindən irəli sürülən şərtləri qəbuledilməz hesab edir, lakin razılaşmanın bağlanmasına hazırlığını qoruyub saxlayır.
Bizim.Media xəbər verir ki, bunu ABŞ-nin dövlət katibi Marko Rubio Parisdə "Yeddilər qrupu" (G7) ölkələrinin XİN rəhbərlərinin görüşünün yekunlarına dair mətbuat konfransında bildirib.
"İran razılaşma bağlamağı çox istəyərdi. Problem ondadır ki, onların irəli sürməkdə davam etdiyi şərtlər absurddur. Onlar hazırda, əslində, sadəcə qeyri-ciddi davranırlar", - Rubio bildirib.
Bununla belə, o, Tehranın mövqeyinin dəyişə biləcəyini istisna etməyib.
Dövlət katibinin sözlərinə görə, ABŞ prezidenti Donald Tramp tərəflərin maraqlarına cavab verəcəyi təqdirdə razılaşmanı dəstəkləməyə hazırdır.
"Əgər razılaşma ortaya çıxarsa, prezident onun bağlanmasını birinci dəstəkləyəcək. Amma bu, axmaq və pis bir razılaşma olmamalıdır", - o vurğulayıb.
Rubio həmçinin bildirib ki, İranın tələblərindən biri təzminatların ödənilməsidir ki, Vaşinqton buna qarşı çıxır:
"Onlar təzminat tələb edirlər. Təzminatları onlar ödəməlidirlər, çünki regionda uzun müddət ərzində sabitliyi pozan onlardır".
Onun sözlərinə görə, Tehran həmçinin böyük məbləğdə pul vəsaitlərinin verilməsini tələb edir.
"Onlar bir yığın nağd pul tələb edirlər. Və prezident açıq şəkildə bildirdi ki, bu, baş verməyəcək", - Rubio əlavə edib.
Bizim.Media
Mənbə: bizim.media
scorpion.az