Avropa ölkələri qarşıdan gələn istilik mövsümünə son 15 ilin ən aşağı qaz ehtiyatları ilə başlamaq riski ilə üz-üzədirlər. Bu vəziyyət qışda həm biznes subyektləri, həm də əhali üçün qiymət artımı təhlükəsi yaradır.
Bu barədə analitiklərin və sənaye ekspertlərinin məlumatlarına istinadən "Financial Times" nəşri məlumat yayıb.
"Wood Mackenzie" şirkətinin proqnozlarına əsasən, oktyabrın sonunadək Avropa İttifaqındakı (Aİ) anbarların yalnız 76 faizi dolacaq.
Qeyd olunur ki, bu, 2011-ci ildən bəri ən aşağı göstəricidir. Mövcud vəziyyət İran ətrafında fevral ayında baş verən gərginlik səbəbindən Hörmüz boğazında gəmiçiliyin dayandırılması və Aİ-nin 2027-ci il yanvarın 1-dən Rusiya istehsalı olan mayeləşdirilmiş təbii qazın (LNG) idxalını qadağan etmək planları ilə əlaqədardır.
Soyuq qış aylarından sonra qaz ehtiyatları 28 faiz təşkil edirdisə, 2026-cı ilin may ayına qədər bu rəqəm cəmi 48 faizə çatıb. Şirkətləri alqı-satqıya həvəsləndirməyən yüksək qiymətlər səbəbindən aprel ayında anbarlara qaz vurulması prosesi ləng gedib.
Mənbə: oxu.az
scorpion.az