Ukrayna hərbi rəhbərliyi Rusiya xüsusi xidmət orqanlarının Ukrayna daxilində həyata keçirdiyi gizli agentura və casusluq şəbəkəsinin qurulma prinsipləri barədə beynəlxalq ictimaiyyətdə böyük rezonans doğuracaq sensasiyalı faktları açıqlayıb.
Ukrayna Müdafiə Nazirliyinin Baş Kəşfiyyat İdarəsinin (GUR) rəhbəri Kirill Budanov yerli KİV-ə müsahibəsində Rusiyanın ölkə daxilində yerli vətəndaşları əməkdaşlığa necə cəlb etməsinin pərdəarxası məqamlarına toxunub. Kəşfiyyat rəhbərinin sözlərinə görə, Ukrayna daxilində rus agentlərinin qəbulu və gizli fəaliyyəti demək olar ki, tamamilə ideoloji deyil, xalis iqtisadi və maddi maraqlara əsaslanır.
Budanov düşmən tərəfindən pulla ələ alınan və xəyanət yolunu seçən bu şəxsləri daxili jarqonda konkret adla çağırdıqlarını bəyan edib: "Bu prosesin təməlində tamamilə daxili yoxsulluq dayanır. Biz kəşfiyyatda onları '300 dollarlıq adamlar' adlandırırıq. Çünki Rusiyanın kəşfiyyat şəbəkəsinə adam cəlb etmək üçün təklif etdiyi standart qiymət cəmi 300 dollar təşkil edir".
Budanov bu problemin ölkə təhlükəsizliyi üçün yaratdığı acınacaqlı reallığı gizlətməyərək, daxili agentura ilə mübarizənin son dərəcə çətin olduğunu etiraf edib: "Maddi çətinliklər ucbatından bu məbləğ qarşılığında düşmənə məlumat ötürən şəxsləri tamamilə müəyyən etmək və onları qabaqcadan dayandırmaq praktiki cəhətdən demək olar ki, qeyri-mümkündür".
Mənbə: musavat.com
scorpion.az