Yəməndə təhlükəli dırmanış videoları ilə tanınan və sosial şəbəkələrdə “Yəmənin Hörümçək Adamı” ləqəbi ilə məşhurlaşan Əl-Qa'qa bin Antar faciəli şəkildə həyatını itirib.
Gənc alpinist Dhamar vilayətində yerləşən Haradhat Damt vulkan kraterində sosial media üçün növbəti çəkilişini həyata keçirərkən yıxılıb.
O, heç bir təhlükəsizlik avadanlığından istifadə etmədən təxminən 120 metr dərinliyindəki kraterin dik qayalarına dırmanmağa çalışarkən tarazlığını itirərək aşağı yıxılıb.
Hadisədən sonra əraziyə cəlb olunan xilasetmə qrupları çətin relyef və kraterin dibindəki kükürdlü su səbəbindən əməliyyatı saatlarla davam etdiriblər. Nəticədə Əl-Qa'qa bin Antarın cəsədi böyük çətinliklə kraterdən çıxarılıb.
Əl-Qa'qa bin Antar Yəməndə və regionda təhlükəli qaya dırmanışları, hündür qayalar üzərində nümayiş etdirdiyi təchizatsız akrobatik hərəkətlərlə tanınırdı. Onun paylaşdığı görüntülər sosial mediada milyonlarla baxış toplayıb və buna görə də izləyicilər ona “Yəmənin Hörümçək Adamı” ləqəbini veriblər.
Gənc alpinistin ölümü ölkədə böyük kədər doğurub. Sosial şəbəkələrdə yüzlərlə istifadəçi onun ailəsinə başsağlığı verib, hadisə isə təhlükəsizlik avadanlığı olmadan həyata keçirilən riskli dırmanışların yaratdığı təhlükələri bir daha gündəmə gətirib.
Mənbə: qafqazinfo.az
scorpion.az