Meyvələrin şirin olması onların qanda şəkərin səviyyəsinə mənfi təsir etdiyi anlamına gəlmir. Diyetoloqlar bildirirlər ki, alma və armud balanslı qidalanmanın tərkibində qan şəkərinin daha stabil saxlanmasına kömək edə bilər. Hər iki meyvənin üstünlükləri olsa da, armud lif baxımından cüzi üstünlüyə malikdir.

"EatingWell" nəşrinə istinadən xəbər verilir ki, almanın əsas üstünlüklərindən biri tərkibindəki pektindir.

Bu həll olunan lif həzmi yavaşladır və qlükozanın qana daha tədricən keçməsinə kömək edir. Buna görə alma adətən aşağı glisemik indeksli meyvələr sırasında yer alır. Tərkibindəki polifenolların da orqanizmin qlükoza ilə mübarizəsində əlavə rol oynaya biləcəyi qeyd olunur.

Araşdırmalara görə, yeməkdən əvvəl alma istehlak etmək xüsusilə karbohidratlarla zəngin qidadan sonra qanda şəkərin kəskin yüksəlməsini müəyyən qədər azalda bilər.

Armud da oxşar xüsusiyyətlərə malikdir. Orta ölçülü bir armudda təxminən 27 qram karbohidrat və 6 qram lif olur. Lifin əhəmiyyətli hissəsi qabığın içində və dərhal altında yerləşdiyi üçün armudu qabığı ilə yemək tövsiyə edilir. Armudun tərkibindəki su və həll olunan lif şəkərlərin daha yavaş mənimsənilməsinə kömək edir.

Bundan başqa, armuddakı bəzi lif növləri bağırsaqdakı faydalı bakteriyalar üçün qida rolunu oynayır. Bu bakteriyaların yaratdığı qısa zəncirli yağ turşularının uzunmüddətli perspektivdə qanda şəkərin tənzimlənməsində müəyyən rolu ola biləcəyi ehtimal edilir. Lakin bu əlaqəni tam təsdiqləmək üçün daha geniş araşdırmalara ehtiyac var.

Hansını seçmək daha yaxşıdır?

Diyetoloqların fikrincə, alma və armud arasında qanda şəkərin səviyyəsinə təsir baxımından böyük fərq yoxdur. Hər ikisi aşağı glisemik indeksə malikdir, lif, su və antioksidantlarla zəngindir.

Lif miqdarına üstünlük verirsinizsə, armud cüzi üstünlüyə sahibdir. Gündəlik istifadə baxımından isə alma daha əlçatan və müxtəlif növləri ilboyu asan tapılan meyvədir.

Mütəxəssislər bir meyvəni digərindən üstün tutmaq əvəzinə, qidalanmada müxtəlifliyə üstünlük verməyi məsləhət görürlər. Alma, armud və digər bütöv meyvələrin növbəli şəkildə istehlakı orqanizmi daha geniş çeşiddə vitamin, mineral və bitki mənşəli faydalı birləşmələrlə təmin edə bilər.

Meyvəni necə yemək daha faydalıdır?

Meyvənin özü ilə yanaşı, onun necə istehlak edilməsi də əhəmiyyətlidir. Mütəxəssislər bütöv və mümkün olduqda qabığı soyulmamış meyvələrə üstünlük verməyi tövsiyə edirlər.

Meyvəni zülal və ya faydalı yağlarla birlikdə yemək də qlükozanın qana daha yavaş keçməsinə və toxluq hissinin daha uzun davam etməsinə kömək edə bilər. Məsələn, armudu kəsmiklə, almanı isə yumurta və ya az miqdarda qoz-fındıqla birlikdə istehlak etmək mümkündür.

Beləliklə, qanda şəkərin səviyyəsini qorumaq baxımından alma və armud arasında aydın qalib yoxdur. Armud lif miqdarına görə bir qədər üstün olsa da, əsas məsələ meyvəni bütöv şəkildə və balanslı qidalanmanın bir hissəsi kimi istehlak etməkdir. (Demokrat.az)

Mənbə: bizim.media